సోషల్ మీడియాలో వైరల్ అవుతున్న సైబారాబాద్ ట్రాఫిక్ పోలీసుల ట్వీట్..!

ట్రాఫిక్ నిబంధనలపై ప్రజల్లో అవగాహన కల్పించేందుకు సోషల్ మీడియాని వేదికగా చేసుకున్నారు సైబారాబాద్ ట్రాఫిక్ పోలీసులు. అయితే నిత్యం పలు రకాల వీడియో సందేశాలను, మీమ్‌లను పోస్టు చేస్తూ ప్రజల్లో అవగాహన కలిగించే ప్రయత్నం చేస్తున్నారు. తాజాగా సైబరాబాద్ ట్రాఫిక్ పోలీసులు ఓ ట్వీట్ చేశారు. మీ పిల్లలు బండి నడిపే ప్రవర్తనపై నిఘా పెట్టండి, వారు తరచూ ఉల్లంఘనలు చేస్తూ ఉంటే వారికి బండి ఇవ్వకండని తల్లిదండ్రులకు సూచిస్తూ ఓ సరదా వాట్సాప్ చాట్‌ను పోస్ట్ చేశారు. ప్రస్తుతం ఈ ట్వీట్ నెట్టింట తెగ వైరల్‌గా మారింది.

అసలు ఆ వాట్సాఫ్ చాట్ తండ్రీ కొడుకుల మధ్య జరిగింది. అందులో ఏముందంటే ట్రాఫిక్ చలాన్లు తండ్రి మొబైల్ ఫోన్‌కు రాగా ఆ మెసేజ్‌‌ను తన కొడుకు వాట్సాప్‌ నంబర్‌కు ఫార్వార్డ్ చేస్తాడు. ఏంట్రా ఇది అని కొడుకుని తండ్రి ప్రశ్నించగా ఏమో నాన్న.. రాంగ్ చలానా అనుకుంటా అని ఆ అబ్బాయి సమాధానమిస్తాడు. అవునా.. మరి ఇదేంటో అంటూ చలాన్‌కు సంబంధించిన ఫఒటోను పంపిస్తాడు. అప్పుడు కొడుకు సారీ నాన్న కాలేజీకి వెళ్లే తొందరలో అలా వెళ్లాను అని రిప్లై ఇస్తాడు. అయితే ఆ తండ్రి వెంటనే మీ కాలేజీ కోఠీలో కదరా.. ఇన్ ఆర్బిట్ మాల్‌లో స్పెషల్ క్లాస్ చెప్తున్నారా.. ఇంటికి రా మాట్లాడాలని అంతేకాదు కోఠీకి ఏ బస్సు వెళుతుందో తెలుసుకుని రా.. రేపటి నుంచి అందులోనే వెళ్లాలి అంటూ షాక్ ఇచ్చాడు. అయితే ఈ సంభాషణ హాస్యాన్ని పుట్టించిన, చక్కని సందేశమంటూ నెటిజన్ల నుంచి ప్రశంసలు అందుతున్నాయి.